महानिर्देशकको जवाफ : परेको सामना गर्छु, तर मन्त्री किरातीलाई स्पष्टीकरण दिन्न

काठमाडौं– नेपाल नागरिक उड्डयन प्राधिकरणका महानिर्देशक प्रदीप अधिकारीले संस्कृति, पर्यटन तथा नागरिक उड्डयनमन्त्री सुदन किरातीले सोधेको स्पष्टीकरणको जवाफ नदिने बताएका छन् । उनले बरु परेको सामना गर्ने जवाफ दिएका छन् ।

सोमबार किरातीले महानिर्देशक अधिकारीलाई ९ बुँदे स्पष्टीकरण सोध्ने निर्णय गरेका थिए । अति गोप्य भनि अधिकारीलाई सोधिएको स्पष्टीकरण सामाजिक सञ्जालमा मन्त्रीले सार्वजनिक गरेकाले आफूले जवाफ नदिने बताएका हुन् ।

‘म परेको सबै फेस गर्छु, तर स्पष्टीकरण दिन्नँ,’ महानिर्देशक अधिकारीले भनेका छन्,‘राष्ट्रिय सुरक्षामा नै गम्भीर असर पर्ने खालका सूचना चुहिने गरी मन्त्रीज्यूले पत्र सामाजिक सञ्जालमा राख्नुभएको छ, यो सही छैन ।’