स्पेन विश्वकप फुटवलकाे फाइनलमा

स्पेनले विश्वकप सेमिफाइनलमा फ्रान्सलाई २–० ले पराजित गर्दै आफ्नो इतिहासकै दोस्रो विश्वकप फाइनलमा स्थान बनाएको छ । यो जित केवल नतिजामा सीमित रहेन, खेलको नियन्त्रण, धैर्यता र सामूहिक प्रदर्शनका हिसाबले स्पेनले पूर्ण “मास्टरक्लास” प्रस्तुत गर्‍यो ।

प्रतियोगिताभर शानदार प्रदर्शन गरेको फ्रान्सलाई अधिकांशले उपाधिको प्रमुख दाबेदार मानेका थिए । किलियन एमबाप्पे, उस्मान डेम्बेले र माइकल ओलिसे जस्ता आक्रमणकारी खेलाडीका कारण फ्रान्सको अग्रपंक्ति निकै डर लाग्दो मानिएको थियो । तर स्पेनले युरोपियन च्याम्पियन किन हो भन्ने कुरा मैदानमै देखायो ।

प्रशिक्षक लुइस दे ला फुएन्तेको टोलीले फ्रान्सलाई बलमा दबाब दिँदै खेलको गति आफ्नै नियन्त्रणमा राख्यो । स्पेनले लगातार ३७ खेलसम्म अपराजित रहने आफ्नो कीर्तिमानी यात्रालाई पनि जारी राख्यो ।

विश्वकपको सुरुआतमा नवप्रवेशी केप भर्डेसँग बराबरी खेलेपछि स्पेनलाई धेरैले खासै चर्चा गरेका थिएनन्। किशोर सुपरस्टार लामिन यामालले पनि प्रतियोगितामा केवल एक गोल गरेका थिए । तर निर्णायक चरणमा स्पेनले आफ्नो उत्कृष्ट लय समातेको छ। सात खेलमध्ये छ खेलमा क्लिनसिट राख्नु उनीहरूको बलियो रक्षात्मक संरचनाको प्रमाण हो ।

अब आइतबार हुने फाइनलमा स्पेनले अर्जेन्टिना वा इङ्ल्यान्डमध्ये एकसँग खेल्नेछ । वर्तमान प्रदर्शन हेर्दा स्पेनलाई उपाधिको मुख्य दाबेदार मान्न थालिएको छ ।

फ्रान्सले पूरै खेलमा लक्ष्यतर्फ केवल तीन प्रहार मात्र गर्न सक्यो। स्पेनको मिडफिल्ड नियन्त्रणले फ्रान्सका आक्रमणकारी खेलाडीलाई प्रभाव जमाउनै दिएन ।

पूर्व प्रिमियर लिग च्याम्पियन क्रिस सटनले भने, “स्पेनले फ्रान्सलाई पूर्ण रूपमा तह लगायो । हामीले प्रतियोगिताभर फ्रान्सको प्रशंसा गर्‍यौं, तर स्पेनले उनीहरूलाई मैदानमा दबायो र उत्कृष्ट फुटबल खेल्यो ।”

आईटीभीका विश्लेषक रोय किनले थपे, “फ्रान्स टोलीको रूपमा खेलेन। उत्कृष्ट व्यक्तिगत खेलाडीहरू थिए, तर सामूहिकता थिएन। स्पेन भने हेर्न लायक टोली बनेको छ ।”

सन् २०२२ डिसेम्बरमा लुइस दे ला फुएन्ते स्पेनको मुख्य प्रशिक्षक नियुक्त हुँदा धेरैले उनलाई “लुइस दे ला हु?” भनेर व्यंग्य गरेका थिए । उनी स्पेनका उमेर समूह टोलीहरू सम्हालेका प्रशिक्षक थिए र ठूलो नामका प्रशिक्षकहरूसँग तुलना गरिन्थ्यो ।

तर ६५ वर्षीय दे ला फुएन्तेले आलोचकलाई मैदानमै जवाफ दिएका छन् । उनले स्पेनलाई यूईएफए नेसन्स लिग २०२३ को उपाधि, यूईएफए युरो २०२४ को गौरव र अब विश्वकप फाइनलसम्म पुर्‍याएका छन् ।

यदि इङ्ल्यान्डले बुधबार एटलान्टामा अर्जेन्टिनालाई हरायो भने दुई वर्षअघिको युरोपियन च्याम्पियनसिप फाइनलको पुनरावृत्ति हुनेछ, स्पेन विरुद्ध इङ्ल्यान्ड ।

तर अहिलेको अवस्थामा एउटा कुरा स्पष्ट देखिएको छ: विश्व फुटबलले फेरि एकपटक स्पेनलाई गम्भीरतापूर्वक लिनुपर्ने समय आएको छ ।