सुनसरीको देवानगञ्ज गाउँपालिका–३ कप्तानगन्जमा गत आइतबार राति भएको हिंसात्मक झडपमा गोली लागेर घाइते भएका अर्का एक युवकको उपचारका क्रममा मृत्यु भएको छ । यससँगै उक्त घटनामा ज्यान गुमाउनेको संख्या दुई पुगेको छ ।
नेपाल प्रहरीका प्रवक्ता डिआइजी अबिनारायण काफ्लेका अनुसार, उपचाररत कप्तानगन्जका २१ वर्षीय जयप्रकाश मेहताको विराटनगरस्थित न्युरो अस्पतालमा बिहीबार मृत्यु भएको हो । उनको पेटमा गोली लागेको थियो ।
घटनामा घाइते भएका अन्य आठ जनाको विराटनगरका विभिन्न अस्पतालमा उपचार भइरहेको प्रहरीले जनाएको छ ।
मृतक जयप्रकाश मेहता सिटी सफारी चालक थिए । यसअघि सोही घटनामा देवानगञ्ज–३ का २४ वर्षीय ओमप्रकाश मेहताको मृत्यु भएको थियो ।
सुनसरीको देवानगञ्जमा दुई पक्षबीच भएको झडप हिंसात्मक बनेपछि जिल्लाका विभिन्न क्षेत्रमा कर्फ्यु जारी गरिएको छ ।
साे हिंसात्मक घटनाको विरोधमा धनुषाको जनकपुरमा पनि बिहीबार बिहानदेखि प्रदर्शन जारी रहेको छ । प्रदर्शनकारीहरूले रामानन्द चोकमा सडक अवरुद्ध गर्दै विरोध जनाएका छन् भने प्रदर्शन अन्य क्षेत्रमा समेत फैलिएको छ ।
बदलिँदो सुरक्षा अवस्थालाई मध्यनजर गर्दै धनुषा जिल्ला सुरक्षा समितिको बैठक जारी रहेको प्रमुख जिल्ला अधिकारी प्रेमप्रसाद लुइँटेलले जानकारी दिएका छन् ।
उनका अनुसार, परिस्थितिको मूल्यांकन गर्दै आवश्यक परे जनकपुरमा कर्फ्यु आदेश जारी गर्ने विषयमा पनि छलफल भइरहेको छ ।
‘सुरक्षा समितिको बैठक बसिरहेको छ । अवस्था हेरेर आवश्यक निर्णय लिइन्छ, कर्फ्यु लगाउने विषयमा पनि छलफल भइरहेको छ,’ प्रमुख जिल्ला अधिकारी लुइँटेलले बताए ।
प्रदर्शनका क्रममा दुई पक्षबीच तनाव बढेपछि विभिन्न संवेदनशील स्थानमा प्रहरी परिचालन गरिएको छ ।
सुनसरीको देवानगञ्जमा भएको झडपपछि मधेश प्रदेशका विभिन्न जिल्लामा विरोध प्रदर्शन फैलिँदै गएको छ भने सुरक्षा निकायले अवस्था नियन्त्रणमा राख्न निगरानी र सुरक्षा व्यवस्था थप कडा बनाएको छ ।
प्रतिक्रिया