नुवाकोट । परराष्ट्रमन्त्री शिशिर खनालले भोटेकोशी बाढीका कारण चीनको केरुङमा रोकिएका नेपाली नागरिकलाई वैकल्पिक मार्ग हुँदै नेपाल ल्याइने बताएका छन्।
बाढी प्रभावित क्षेत्रको निरीक्षणका लागि आइतबार विदुर नगरपालिका–१, ढुङ्गे पुगेका मन्त्री खनालले प्रारम्भिक जानकारीअनुसार केरुङमा करिब एक हजार नेपाली रहेको बताएका हुन्।
“प्रारम्भिक जानकारीअनुसार केरुङमा एक हजार जना नेपाली हुनुहुन्छ भन्ने सूचना छ। उहाँहरूलाई वैकल्पिक मार्गबाट नेपाल ल्याउँछौँ,” उनले भने।
सिन्धुपाल्चोकस्थित तातोपानी नाका सञ्चालनमा ल्याउन तथा मुस्ताङको कोरला नाका प्रयोग गर्न चिनियाँ पक्षसँग अनुरोध गरिसकेको मन्त्री खनालले जानकारी दिए।
उनका अनुसार बाढीका कारण जलविद्युत् आयोजनाका सुरुङमा फसेकाको उद्धारका लागि विदेशी विशेषज्ञको सहयोग आवश्यक देखिएपछि चीन र भारतबाट विशेषज्ञ बोलाइएको छ।
“आवश्यक परेमा अन्य मुलुकबाट पनि सहयोग लिन सकिन्छ,” उनले भने, “हामीलाई विश्वसमुदायबाट सहयोगको प्रतिबद्धता आइरहेको छ। आवश्यकताअनुसार सहयोग लिन्छौँ।”
प्रतिक्रिया