आज पाँच बजेभित्र उपराष्ट्रपतिका उम्मेद्वारको अन्तिम नामावली प्रकाशित हुने

काठमाडौं– निर्वाचन अधिकृतको कार्यालयले उपराष्ट्रपति पदको निर्वाचनका लागि उम्मेद्वारहरुको अन्तिम नामावली आज प्रकाशन गर्दैछ । आज साँझ ५ बजेभित्र उम्मेदवारहरुको अन्तिम नामावली प्रकाशन हुने कार्यालयले जनाएको छ ।

उपराष्ट्रपति पदका लागि नेकपा एमालेबाट एक र सत्ता साझेदार दलबाट ३ जनाले उम्मेद्वारी दिएका छन् । एमालेबाट उपाध्यक्ष अष्टलक्ष्मी शाक्य उम्मेदवार छन् भने गठबन्धन दलबाट जनता समाजवादी पार्टीका रामसहायप्रसाद यादव र प्रमिला कुमारी यादव छन् । त्यस्तै, जनमत पार्टीकी ममता झाले पनि उम्मेदवारी दिएकी छन् ।

रामसहायप्रसाद यादवको उम्मेदवारी खारेजीको माग गर्दै अष्टलक्ष्मी शाक्य र ममता झाले निर्वाचन आयोगमा उजुरी दिएका छन् । राष्ट्रपतिमा पुरुष उम्मेदवार रामचन्द्र पौडेल निर्वाचित भइसकेकाले उपराष्ट्रपतिमा महिला उम्मेद्वार हुनुपर्ने माग उनीहरुको छ । ती उजुरीहरुमाथि जाँचबुझ गरी १२ बजेभित्र निर्णय गर्ने, नामावली फिर्ताको समय दिने र पाँच बजेभित्र अन्तिम नामावली प्रकाशन गर्ने तालिका रहेको सहायक निर्वाचन अधिकृत अमृताकुमारी शर्माले जानकारी दिइन् ।