मन्त्रिपरिषद् विस्तार, नयाँ मन्त्रीले लिए सपथ

काठमाडौं– प्रधानमन्त्री पुष्पकमल दाहाल प्रचण्डले मन्त्रिपरिषद् विस्तार गरेका छन् । मंगलबार नियुक्त भएका मन्त्रीहरुले राष्ट्रपति बिद्यादेवी भण्डारीबाट पद तथा गोपनीयताको शपथ लिएका छन् ।

नेकपा एमाले, नेकपा माओवादी केन्द्र, राष्ट्रिय स्वतन्त्र पार्टी र राष्ट्रिय प्रजातन्त्र पार्टीबाट मन्त्री भएकाहरुले राष्ट्रपति कार्यालयमा पद तथा गोपनीयताको शपथ लिएका हुन् । राष्ट्रिय प्रजात्नत्र पार्टीका अध्यक्ष राजेन्द्र लिङ्देन उपप्रधानमन्त्री तथा ऊर्जा तथा जलस्रोत मन्त्रीको शपथ लिएका छन् ।

आज सपथ लिने मन्त्रीहरुमा सत्तारुढ सबैभन्दा ठूलो दल एमालेबाट नेकपा एमालेबाट डा. विमला राई पौडेल, पदम गिरी, भगवती चौधरी र हरि उप्रेती छन् । पौडेललाई परराष्ट्र, गिरीलाई स्वास्थ्य, चौधरीलाई महिला, बालबालिका तथा ज्येष्ठ र उप्रेतीलाई रक्षा मन्त्रालयको जिम्मेवारी दिइएको छ । यसअघि नै उपप्रधानमन्त्री तथा अर्थमन्त्री बिष्णु पौडेलवाहेक तीन जनालाई बिना बिभागिय मन्त्री नियुक्त गरिएको थियो । त्यसबेला नियुक्त भएका दामोदर भण्डारीलाई उद्योग, बाणिज्य तथा आपूर्ति, ज्वालाकुमारी शाहलाई कृषि र राजेन्द्र राईलाई भूमिसुधार तथा सहकारी मन्त्रालयको जिम्मेवार दिइएको छ ।

त्यस्तै, माओवादीबाट रेखा शर्मा सूचना, सञ्चार तथा प्रविधिमन्त्री र अमनलाल मोदी संघीय मामिला तथा सामान्य प्रशासनमन्त्री भएका छन् । सुदन किराती पर्यटन तथा नागरिक उड्ययनमन्त्री र सुशीला श्रीपाली भौतिक पूर्वाधार राज्यमन्त्री भएकी छन् । माओवादीबाटै नारायणकाजी श्रेष्ठ यसअघि नै उपप्रधानमन्त्री तथा भौतिक पूर्वाधारमन्त्री भइसकेका छन् ।
राप्रपाबाट सहरी विकासमन्त्रीमा उपाध्यक्ष बिक्रम पाण्डे र कानुनमन्त्रीमा ध्रुवबहादुर प्रधान रहेका छन् । राप्रपाबाटै दीपक सिंह उर्जा राज्यमन्त्री भएका छन् ।

राष्ट्रिय स्वतन्त्र पार्टीबाट डोलप्रसाद अर्याललाई श्रम र शिशिर खनाललाई शिक्षा मन्त्री नियुक्त गरिएको छ । यस्तै तोसिमा कार्की स्वास्थ्य तथा जनसंख्या राज्यमन्त्रीमा बनेकी छिन् । रास्वपा अध्यक्ष रवि लामिछाने यसअघि नै उपप्रधानमन्त्री तथा गृहमन्त्री भएका थिए ।