काठमाडौं– प्रमुख दलका शिर्ष नेताहरु राष्ट्रपति पदको साझा उम्मेदवार चयन गर्न आज निर्णायक वार्तामा जुट्दैछन् । राष्ट्रपतिका लागि भोलि उम्मेद्वारको मनोनयन हुँदैछ ।
विहीवार तीन दलको वैठकपछि प्रधानमन्त्री तथा माओवादी अध्यक्ष पुष्पकमल दाहाल प्रचण्डले शुक्रवार (आज) एमाले अध्यक्ष केपी शर्मा ओलीसँग वार्ता गर्ने बताएका थिए । त्यस अनुसार, आज ओली र प्रचण्डबीच भेटवार्ता हुँदैछ ।
तर ओलीसँगको वार्ता अघि नै हिजो बसेका तीन दल माओवादी, जनता समाजवादी र एकीकृत समाजवादीले नेपाली कांग्रेससँग अहिले विहान वार्ता गर्ने बताएका छन् । हिजोको बैठकमा माधव नेपाललाई राष्ट्रपतिमा अघि सार्ने र उपराष्ट्रपति जसपाबाट अघि सार्नेवारे छलफल भएको एकीकृत समाजवादीका एक नेताले दृष्टान्तलाई बताएका छन् । त्यही समझदारी अनुसार, नेपाली कंग्रेससँगको वार्तामा प्रस्तुत हुने र कांग्रेसको धारणापछि एमाले अध्यक्ष ओलीसँग वार्ता गर्ने तयारीमा प्रचण्ड देखिएका छन् । अध्यक्ष ओलीले यसअघि नै माधवकुमार नेपाललाई राष्ट्रपति बनाउने प्रस्ताव गरिसकेका छन् । उनले नेपालसहित सुवास नेम्वाङको नामसमेत प्रस्ताव गरेका थिए ।
श्रोतका अनुसार, राष्ट्रिय सहमतिको नारा लगाएर एमालेलाई निषेध गरेर जाने अवस्था गलत हुने भन्दै तीन दलकै केही नेताले बिषय प्रवेश गराएपछि फरक ढंगले छलफल अघि बढेको हो । त्यहाँ भएको छलफलमा, माधव नेपाललाई राष्ट्रपति बनाएर अघि बढ्दा कम्युनिष्ट एकताको प्रयास अघि बढाउन सकिने र ढिलोचाडो त्यो सम्भव हुने लाइनमा कुरा भएको थियो ।
एमालेसँग एकताभन्दा पहिला माओवादी, जसपा र एकीकृत समाजवादीबीच नै समाजवादी मोर्चा बनाएर अघि बढ्ने र त्यसकै वलमा एमालेसँग पनि एकताको पहल गर्न सकिनेवारेमा पनि छलफल भएको थियो । जसपाले उपराष्ट्रपति पाएमा उपेन्द्र यादव पनि कम्युनिष्ट मोर्चा निर्माणमा जुट्न सहमत भएको श्रोतको दावी छ ।
सकेसम्म माधव नेपालको नाममा कांग्रेसलाई समेत मनाएर राष्ट्रिय सहमति कायम गर्ने, नसके पनि बहुमतका आधारमा निर्वाचित गर्ने प्रयासमा तीन दल लाग्ने सम्भावना रहेको एक नेताले बताए । कांग्रेस भने कम्युनिष्ट गठवन्धन भत्काएर राष्ट्रपति आफूले लिने र बरु प्रचण्डलाई पूर्ण कार्यकाल नै प्रधानमन्त्री दिने तयारीमा समेत देखिएको छ । त्यसैले वार्ता कसरी अघि बढ्छ र के निर्णय हुन्छ भन्न सक्ने अवस्था भने छैन । २५ गते राष्ट्रपति पदको निर्वाचन हुँदैछ ।
प्रतिक्रिया