फुटबल संसारले लामो समयदेखि प्रतिक्षा गरेको महायुद्ध अब डलासमा हुने भएको छ । मंगलबार फ्रान्स र स्पेन विश्वकपको सेमिफाइनलमा आमनेसामने हुँदैछन्, जहाँ जित्ने टोलीले फाइनलमा स्थान बनाउनेछ ।
सन् २०१८ को विश्वविजेता फ्रान्स लगातार तेस्रो विश्वकप फाइनलमा पुग्ने लक्ष्यमा छ भने सन् २०१० को च्याम्पियन स्पेन एकैसाथ विश्वकप र युरो कप दुवै उपाधि जित्ने चौथो राष्ट्र बन्ने अभियानमा छ ।
दुवै टोली स्टार खेलाडीले भरिएका छन्, तर सबैको नजर किलियन एमबाप्पे र लामिन यामाल माथि केन्द्रित हुनेछ ।
एमबाप्पेले २०१८ विश्वकपमा अर्जेन्टिनाविरुद्धको खेलमा दुई गोल गर्दै विश्व फुटबलमा आफ्नो नाम स्थापित गरेका थिए । त्यसबेला उनले लियोनल मेस्सीलाई छायामा पार्दै नयाँ पुस्ताको आगमन संकेत दिएका थिए ।
अब आठ वर्षपछि १८ वर्षीय यामालले पनि त्यही काम दोहोर्याउने अवसर पाएका छन् । यस विश्वकपमा उनले अझै आफ्नो उत्कृष्ट प्रदर्शन देखाउन सकेका छैनन्, तर सेमिफाइनलजस्तो ठूलो मञ्चमा चम्किने अपेक्षा गरिएको छ ।
रियल म्याड्रिडबाट गत सिजन ४४ खेलमा ४२ गोल गरेका एमबाप्पे अहिले विश्वकै उत्कृष्ट खेलाडी मानिन्छन् । उनले ला लिगा र च्याम्पियन्स लिग दुवैमा सर्वाधिक गोल गरेका थिए ।
विश्वकपमा पनि उनले ६ खेलमा ८ गोल गर्दै गोल्डेन बुटको दौडमा मेस्सीसँग बराबरी गरेका छन् । ११ गोल योगदानसहित उनी प्रतियोगिताका सबैभन्दा प्रभावशाली खेलाडी बनेका छन् ।
उनको विश्वकप करियर झन् अद्भुत छ । हालसम्म १९ गोल गरिसकेका एमबाप्पे मेस्सी (२०) पछि विश्वकप इतिहासकै दोस्रो सर्वाधिक गोलकर्ता बनेका छन् । उनले मिरोस्लाभ क्लोजेको १६ गोलको कीर्तिमान तोडिसकेका छन् ।
यसै गर्मीमा एमबाप्पेले ओलिभिए गिरुडलाई पछि पार्दै फ्रान्सका सर्वाधिक गोलकर्ता बने । अहिले उनको नाममा १०४ खेलमा ६४ गोल छ ।
गिरुड भन्छन्: “उनी कहाँ पुग्न चाहन्छन् भन्ने स्पष्ट थाहा छ। सानैदेखि नेतृत्व क्षमता देखिन्थ्यो। आफ्नो उमेरभन्दा धेरै परिपक्व थिए ।”
एमबाप्पेको ठूलो सपना भने पेलेको तीन विश्वकप जित्ने कीर्तिमान बराबरी गर्नु हो ।
रियल म्याड्रिडमा उत्कृष्ट व्यक्तिगत प्रदर्शन गरे पनि टोलीलाई ठूलो उपाधि दिलाउन नसकेको भन्दै एमबाप्पेमाथि आलोचना भएको थियो। उनलाई ‘टिमको सामूहिक खेलमा बाधा पुग्ने खेलाडी’ भनेर पनि चर्चा गरिएको थियो ।
तर यस विश्वकपमा उनले त्यसको जवाफ दिएका छन् । फ्रान्सले उच्च क्षेत्रमा बल पुनः कब्जा गर्ने रणनीतिमा सफलता पाउनुमा एमबाप्पेको रक्षात्मक योगदानलाई पनि महत्वपूर्ण मानिएको छ ।
फ्रान्सका महान खेलाडीको चर्चा हुँदा जिनेदिन जिदान र मिशेल प्लाटिनीको नाम अगाडि आउँछ । तर फ्रेन्च फुटबल विश्लेषक जुलियन लोरेन्सको विश्वास छ कि एमबाप्पे अन्ततः उनीहरूलाई पनि उछिन्नेछन् ।
“मेरो भविष्यवाणी छ, करियर सकिँदासम्म एमबाप्पे फ्रान्सका नम्बर एक खेलाडी बन्नेछन् । अझ एक विश्वकप र युरो कप खेल्ने अवसर बाँकी छ, त्यसैले उनी हाम्रो इतिहासकै महान खेलाडी बन्ने सम्भावना धेरै छ ।”
मंगलबारको फ्रान्स–स्पेन भिडन्त केवल सेमिफाइनल मात्र होइन, दुई पुस्ताबीचको संघर्ष पनि हो । एकातिर विश्व फुटबलको स्थापित सुपरस्टार एमबाप्पे छन्, अर्कोतिर नयाँ युगका प्रतीक यामाल ।
फाइनलको टिकट कसले काट्छ भन्ने हेर्न बाँकी छ, तर विश्व फुटबलले अर्को ऐतिहासिक रात पक्का देख्नेछ ।
प्रतिक्रिया