नेपाल स्टक एक्सचेन्ज (नेप्से) बुधबारको कारोबारमा अन्तिम समयमा सुधार देखाउँदै हरियो बन्द भएको छ । दिनभर उतारचढावमा रहेको बजार कारोबारको अन्त्यमा ४.७९ अंक (०.१८ प्रतिशत) ले बढेर २,६६७.९७ विन्दुमा पुगेको हो ।
बुधबार कुल ४ अर्ब ४० करोड ९५ लाख ९४ हजार रुपैयाँ बराबरको सेयर कारोबार भएको छ । ३५० वटा कम्पनीका करिब १ करोड ६ लाख ६७ हजार कित्ता सेयर ६१ हजार २५७ पटक किनबेच भएका छन् ।
कारोबार भएका कम्पनीमध्ये १२० कम्पनीको सेयर मूल्य बढेको, १४५ कम्पनीको घटेको तथा ११ कम्पनीको मूल्य स्थिर रहेको छ । परिसूचक सकारात्मक रहे पनि बढेका कम्पनीभन्दा घटेका कम्पनीको संख्या बढी देखिनुले बजारमा मिश्रित प्रवृत्ति कायम रहेको संकेत गरेको छ ।
यस दिन सोलु हाइड्रोको सेयर मूल्यमा सकारात्मक सर्किट लागेको छ । शिखर पावर, रिडी पावर, बुद्धभूमि नेपाल हाइड्रोपावर र सिनर्जी पावरका लगानीकर्ताले पनि उल्लेखनीय लाभ कमाएका छन् ।
यता, एभरेस्ट कलर लिमिटेडको सेयर मूल्य सबैभन्दा धेरै, करिब ९ प्रतिशतले घटेको छ ।
समूहगत सूचकतर्फ होटल तथा पर्यटन, जलविद्युत्, उत्पादन तथा प्रशोधन, अन्य र व्यापार समूहमा वृद्धि देखिएको छ भने बाँकी सबै समूहका सूचक ओरालो लागेका छन् ।
बजारको कुल पुँजीकरण करिब ४५ खर्ब ८५ अर्ब रुपैयाँ पुगेको छ भने फ्लोट मार्केट क्यापिटलाइजेसन करिब १५ खर्ब ४९ अर्ब रुपैयाँ कायम भएको छ ।
प्रतिक्रिया