काठमाडौँ : नेपाली कांग्रेसका पूर्वसभापति शेरबहादुर देउवा संस्थापन इतर समूहको १५औं महाधिवेशनको क्षेत्रीय प्रतिनिधिमा चयन भएका छन् ।
उनी गृह जिल्ला डडेल्धुराको गन्यापधुरा गाउँपालिका–१ मा सम्पन्न कांग्रेस इतह समूहको वडा अधिवेशनबाट सर्वसम्मत क्षेत्रीय प्रतिनिधि चयन भएका हुन् ।
वडा सभापति पदम महताले पूर्वसभापति देउवालाई सर्वसम्मत क्षेत्रीय प्रतिनिधि चयन गरिएको जानकारी दिए । देउवा समूहले १४औं महाधिवेशनको विधानअनुसार १५औं महाधिवेशन गर्ने तयारी गरिरहेको छ ।
उक्त विधानमा केन्द्रीय कार्यसमितिका पदाधिकारी र सदस्यहरू स्वतः महाधिवेशन प्रतिनिधि हुने व्यवस्था छ । तर, देउवाले भने चुनावी प्रतिष्पर्धामार्फत महाधिवेशन प्रतिनिधिमा जितेर आउनेभन्दै वडाबाटै क्षेत्रीय प्रतिनिधिका लागि आकांक्षा देखिएका छन् ।
गन्यापधुरा–१ का नेता रमेश रावलका अनुसार देउवाले क्षेत्रीय प्रतिनिधिको उम्मेदवारी मनोनयनका लागि स्थानीय कौशिलादेवी देउवालाई वारेसनामा दिएका थिए ।
पूर्वसभापति देउवा यसअघिका महाधिवेशनमा पनि वडाबाटै प्रतिष्पर्धा गर्दै आउने नेतामध्येमा पर्छन् । गन्यापधुरा–१ को वडा अधिवेशनबाट देउवाका स्वकीय सचिव भानु देउवा पनि क्षेत्रीय प्रतिनिधि चयन भएका छन् ।
उनले स्थानीय इन्द्रबहादुर देउवालाई वारेसनामा दिएका थिए । कौशिलादेवी साइनोमा देउवाकी भाइबुहारी र इन्द्रबहादुर काका पर्छन् ।
प्रतिक्रिया