काठमाडौँ : सभामुख डोलप्रसाद अर्यालले अन्तराष्ट्रिय मञ्चहरूमा नेपाली भाषामै सम्बोधन गर्ने भएका छन् ।
असोज १९ गतेदेखि २३ गतेसम्म सञ्चालन हुने अन्तरव्यवस्थापिका संघ (आईपीयू) को १५३ औं महासभामा सहभागी हुन नेपाली संसदीय प्रतिनिधिमण्डलको नेतृत्व गर्दै सभामुख अर्याल आज त्यसतर्फ प्रस्थान गर्दैछन् ।
तान्जानियाको अरुशा शहरमा आयोजना हुने महासभामा सभामुख अर्यालले ‘समावेशीता, विश्वास र अवसरहरू मार्फत सुशासन अभिवृद्धि गर्ने र समुदायहरूलाई सशक्त बनाउने’ विषयक जेनरल डिबेटमा मन्तव्य राख्नेछन् ।
साथै, नेपालले एर्मजेन्सी एजेण्डाको रुपमा ‘अर्जेन्ट पार्लियामेन्ट्री एक्सन’ तय गरेको छ । यसको मूल विषय ‘हिमालयन क्षेत्र तथा अन्य जोखिमपूर्ण क्षेत्रहरूमा जलवायु–सम्बन्धी विपद्हरूको सामना र उत्थानशीलता सुदृढ गरौं’ भन्ने रहेको छ ।
यो प्रस्ताव पनि नेपालको तर्फबाट प्रस्तुत हुनेछ । यस्तो प्रस्तावमा अन्य मुलुकहरूको समेत समर्थन आवश्यक पर्छ ।
सभामुख अर्यालका अनुसार, इर्मजेन्सी प्रस्तावको पक्षमा ५० देशबाट समर्थन पाइसकेको छ । यसबाहेक २८ वटा जति साइडलाइन मिटिङको लागि तयारी भएको छ ।
गत शुक्रबार आफ्नो भ्रमणबारे जानकारी दिनेक्रममा सभामुख अर्यालले आफू अन्तर्राष्ट्रिय मञ्चहरूमा नेपाली भाषालाई प्रवर्द्धन गर्ने गरी प्रस्तुत हुने तयारीमा रहेको बताएका थिए ।
‘म सभामुख भइसकेपछि आजको दिनसम्म र मेरो सभामुखको पूरै कार्यकालमा मैले नेपाली भाषा, मेरो मातृभाषालाई प्रमोट गर्ने कोसिस गरेको छु । मैले सबै कार्यक्रम नेपाली भाषामा गराएको छु,’ सभामुख अर्यालले भनेका थिए ।
उनका अनुसार, उनले नेपालमा जति पनि कूटनीतिक मिटिङहरू गरे सबैमा नेपाली भाषामै संवाद तथा अन्तरक्रिया गरे । अब विदेशमा पनि यही नीति अपनाउने सभामुख अर्यालले बताएका हुन् ।
‘विदेशमा पनि मैले मातृभाषाबाटै संवाद गर्नेछु’ उनले भनेका छन् ।
विगतमा मन्त्री हुँदा अंग्रेजीमा बोलेको र अंग्रेजीमा राम्रो संवाद गर्नै सकिए भए पनि सभामुख भएपछि आफूले नेपाली भाषालाई सबै पक्षसँगको संवादको भाषा बनाएको बताए ।
‘यहाँ (नेपाल)मा जति पनि मैले ४०/५० वटा, ६० वटा जति हामीले बैठक गर्यौं । मलाई कसैले पनि तपाईंले अंग्रेजी बोल्दे हुन्थ्यो भन्नु भएन, उहाँहरू नेपाली बोलेकोमा खुसी पाएको छु । त्यसकारणले पनि यो (नेपाली भाषामै सम्बोधन गर्ने) कुरा जानकारी गराएँ,’ उनले भने ।
अन्तरव्यवस्थापिका संघको १५३ औं महासभा र त्यससँग सम्बन्धित बैठकहरूमा सहभागिता जनाए पश्चात सभामुख अर्याल केन्या जानेछन् ।
केन्याका सभामुख डा.मोसेस एम. वेताङउलाको निमन्त्रणालाई स्वीकार गर्दै नेपाली प्रतिनिधिमण्डलले केन्याको संसद्को औपचारिक भ्रमण गर्न लागेको हो ।
केन्याको भ्रमण समेर प्रतिनिधिमण्डल असोज २७ गते काठमाडौं फर्कने कार्यक्रम रहेको छ ।
प्रतिक्रिया