प्रचण्डले राजनीतिमा बिचित्रको लिला देखाए : मोहन बैद्य

काठमाडौं– नेकपा (क्रान्तिकारी माओवादी) का महासचिव मोहन वैद्यले प्रधानमन्त्री पुष्पकमल दाहालले राजनीतिमा विचित्रको ‘लिला’ देखाउन थालेकाले नेपाली जनताले अब विश्वास गर्ने ठाउँ नरहेको बताएका छन् ।

इच्छुक सांस्कृतिक प्रतिष्ठानले आइतबार काठमाडौंमा आयोजना गरेको कार्यक्रममा महासचिव वैद्यले ओलीलाई खत्तम पार्छु भनेर फेरि ओलीको शरणमा परेको, सरकार बनाएको तर टिकाउन नसकेर फेरी देउवाको शरणमा परेको बताए ।
‘चुनावमा जाने बेलामा गठबन्धन बनाए । प्रतिगमनका विरुद्ध जाने हो । संविधानको रक्षा गर्ने हो, ओलीले खत्तम पारे भनेर कांग्रेस–माओवादी केन्द्रहरु एकदम कुर्लिएर आए । जसका विरुद्ध गएका थिए, त्यसैसँग शरण परेर सरकार बनाए, ल हेर्नुस् । यहाँ भन्दा विचित्र के हुन्छ ? बैद्यले भने, ‘त्यो सरकार त टिकाउनुपर्ने हो नि एमालेसँग बसेर । टिकाउन नसकेर फेरि कांग्रेसतिर गए । यहाँ भन्दा राजनीतिक विचित्रता के हुन्छ ? राजनीतिमा लिला भइसक्यो । यस्तो चालले अब चल्नेवाला छैन । जनताले विश्वास पनि अब गर्नेवाला छैनन ।’

उनले कार्यपालिका, न्यायपालिका, व्यवस्थापिकालगायतका सत्ता र त्यसका अवयवहरु ‘मरेको लास’जस्तै अवस्थामा पुगेको टिप्पणी गरे । उनले कांग्रेस पुरै असफल र कम्युनिष्ट आन्दोलनको नेताहरु गद्दार भएको आरोप लगाए । नयाँ राज्य सत्ता निर्माणका लागि तयार रहन पनि उनले पार्टीका नेता, कार्यकर्तालाई निर्देशन दिए ।