विश्वकप २०२६ मा बेल्जियमले फुटबल इतिहासकै अविस्मरणीय पुनरागमन गर्दै सेनेगललाई ३–२ ले पराजित गरेर अन्तिम १६ मा स्थान बनाएको छ । निर्धारित समय सकिन चार मिनेट बाँकी रहँदा २–० ले पछि परेको बेल्जियमले अनुभवी स्ट्राइकर राेमेलु लुकाकुकाे गोलबाट पुनरागमनको सुरुआत गर्यो । त्यसको तीन मिनेटपछि कप्तान युरी टाइलीमान्सले बराबरी गोल गरे भने अतिरिक्त समयको अन्तिम क्षणमा प्राप्त पेनाल्टीलाई गोलमा परिणत गर्दै बेल्जियमलाई ऐतिहासिक जित दिलाए । १२४ मिनेट ४४ सेकेन्डमा भएको यो गोल विश्वकप इतिहासकै सबैभन्दा ढिलो समयमा गरिएको गोल बनेको छ ।
यो नतिजाले सेनेगललाई गहिरो पीडा दिएको छ । खेलको अधिकांश समय उत्कृष्ट प्रदर्शन गरेको सेनेगलले दुई गोलको अग्रता जोगाउन नसक्दा प्रतियोगिताबाट बाहिरिन बाध्य भयो । निर्णायक पेनाल्टीको निर्णयलाई लिएर विवाद चर्किएको छ भने धेरै पूर्वखेलाडी र विश्लेषकहरूले भार मार्फत दिइएको पेनाल्टी कठोर रहेको टिप्पणी गरेका छन् । अफ्रिका कप अफ नेसन्सको उपाधि विवादास्पद ढंगले गुमाएको केही महिनामै सेनेगलले फेरि अर्को ठूलो निराशा भोग्नुपरेको हो ।
यता सह–आयोजक अमेरिकाले बाेस्निया हर्जगाेभिनालाई हराउँदै अन्तिम १६ मा बेल्जियमसँगको भेट पक्का गरेको छ । तर अमेरिकाले जितसँगै ठूलो धक्का पनि बेहोरेको छ । प्रतियोगितामा तीन गोल गरिसकेका स्ट्राइकर Folarin Balogun ले गोल गरेपछि रातो कार्ड पाउँदै मैदान छाड्नुपरेको छ, जसका कारण उनी कम्तीमा बेल्जियमविरुद्धको महत्त्वपूर्ण खेल गुमाउनेछन् । आवश्यक परे उनको प्रतिबन्ध थप खेलसम्म लम्बिन सक्ने सम्भावना पनि रहेको छ ।
अब यी दुई टोलीबीचको अन्तिम १६ को प्रतिस्पर्धा विश्वकपकै सबैभन्दा रोमाञ्चक खेलमध्ये एक हुने अपेक्षा गरिएको छ ।
प्रतिक्रिया