काठमाडाैँ। उत्तर कोरियाले क्रिप्टोकरेन्सी प्लेटफर्म बाइनान्सबाट ६ अर्ब अमेरिकी डलर चोरी गरेको अमेरिकी सङ्घीय अनुसन्धान ब्युरो (एफबीआई) को आरोप अस्वीकार गरेको छ। उसले आरोपलाई राजनीतिक उक्साहट भन्दै खण्डन गरेकै बेला नयाँ क्लस्टर वारहेडयुक्त रणनीतिक क्रुज मिसाइल परीक्षण गरेको छ।
उत्तर कोरियाली नेता किम जोङ–उनकी बहिनी किम यो जोङले आरोपलाई ‘गम्भीर राजनीतिक उक्साहट’ भनेका छन्। एफबीआईले शनिबार उक्त चोरीमा उत्तर कोरियासँग सम्बन्धित ‘ट्रेडट्रेटर’ नामक ह्याकिङ समूह संलग्न रहेको जनाएको थियो। विज्ञहरूका अनुसार चोरी भएको रकम उत्तर कोरियाको अनुमानित वार्षिक कुल गार्हस्थ्य उत्पादनको करिब एक चौथाइ बराबर छ।
यस घटनापछि दक्षिण कोरियाका राष्ट्रपति ली जे म्युङले साइबर सुरक्षा प्रणाली बलियो बनाउनुपर्नेमा जोड दिए। सन् २०२४ को संयुक्त राष्ट्रसङ्घीय प्रतिवेदनले उत्तर कोरियाको साइबर आक्रमणबाट प्राप्त आम्दानीले सामूहिक विनाशका हतियार विकासमा सहयोग पुगेको उल्लेख गरेको थियो।
सरकारी सञ्चारमाध्यम केसीएनएका अनुसार सोमबार परीक्षण गरिएको क्रुज मिसाइलको वारहेडले पाँचदेखि ६ हेक्टर क्षेत्र ध्वस्त पार्न सक्छ। परीक्षणले मिसाइलको लक्ष्यमा ठाडो प्रहार गर्ने क्षमता सुधारिएको जनाइएको छ। विज्ञका अनुसार यसको उद्देश्य दक्षिण कोरिया र अमेरिकी सैन्य संरचनामाथि प्रहार गर्ने क्षमता प्रदर्शन गर्नुका साथै परम्परागत हतियारमार्फत प्रतिरोध बलियो बनाउनु हो।
दक्षिण कोरियाली सेनाले परीक्षणबारे सार्वजनिक जानकारी दिएको छैन। संयुक्त चिफ्स अफ स्टाफका प्रवक्ता जाङ डो–यङले दक्षिण कोरिया र अमेरिकाले मिसाइलको विशेषता विश्लेषण गरिरहेको बताउनुभएको छ । उहाँका अनुसार परिचालन सुरक्षा र गुप्तचर स्रोतको संरक्षणका कारण सेनाले उत्तर कोरियाका सबै मिसाइल परीक्षण सार्वजनिक गर्दैन।
प्रतिक्रिया